Thembra e Akilit

[fegi]

Heroi i shquar grek, Akili, lindi nga lidhja e Peleut, Mbretit të Thesalisë me Perëndinë e Detit, Tetisin. Nëna e tij, që i përkiste familjes së perëndive të Olimpit donte ta bënte djalin të pavdekshëm, ashtu si ishte edhe ajo.

Tetisi e zhyti foshnjën e saj në ujërat sterrë të zeza dhe të ngrira të lumit të Mbretërisë së të Vdekurve që quhej Stiks. Ujërat magjike të këtij lumi, që kishin forcë ta bënin të paprekshëm cilindo që do të lahej në to, e bënë Akilin luftëtar të pamposhtur, me përjashtim të thembrës, vendi në të cilin nëna e kishte mbajtur.

Centauri Kiron, gjithë mirësi e urtësi, mori përsipër edukimin e Akilit të vogël. Akili mësoi të përballonte rreziqet e pyjeve dhe të përrenjëve, të vraponte po aq shpejt sa një sorkadhe, të ngjiste malet më të thepisura e sidomos të përdorte armët.

Centauri e ushqeu gjithashtu me të brendshme kafshësh, për t’i përcjellë forcën e tyre, pa harruar mjaltin, për t’i dhënë ëmbëlsinë. Pak nga pak djaloshi u bë luftëtar i rrezikshëm.

I etur për lavdi dhe heroizma, bashkë me mikun e tij të pandarë, Patroklin, Akili u bashkua me Uliksin dhe Nestorin për të sulmuar qytetin e Trojës. Kur ishte vetëm pesëmbëdhjetë vjeç, ai mori nën komandën e tij pesëdhjetë anije.

Me këtë rast e ëma i dhuroi katër kuaj të pavdekshëm dhe një armaturë të papërshkrueshme, të punuar nga Hefesti, Perëndia e Farkës. Gjatë pushtimit të Trojës, Akili luftoi me trimëri dhe dukej më i forti nga të gjithë. I mbushur me zemërim të papërmbajtur nga vrasja e Patroklit, ai vrau më trimin e trojanëve, Hektorin, që e kishte vrarë mikun e tij.

Dhe për të tmerruar armiqtë, kufomën e Hektorit e tërhoqi zvarrë pas qerres së tij, përreth qytetit. Për të marrë hak për vdekjen e të vëllait, Paridi, princi i ri që kishte shkaktuar luftën e Trojës, duke rrëmbyer të bukurën Helenë, e dinte të vetmen pikë të prekshme të heroit të pamposhtur.

Dhe gjuajti luftëtarin me një shigjetë drejt e në thembër. Kështu vdiq Akili, heroi të cilit zotat i kishin dhënë një jetë të shkurtër, por të lavdishme.